ໂຮມຊຸມນຸມສະເຫລີມສະຫລອງວັນສ້າງຕັ້ງແຂວງອຸດົມໄຊ ຄົບຮອບ 60 ປີ ເເລະ ວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນເເຂວງອຸດົມໄຊ ຄົບຮອບ 60 ປີ

ສ້າງຂື້ນເມື່ອ ວັນອັງຄານ, 26 ກໍລະກົດ 2022 08:41
ຂຽນໂດຍ ບຸນພອນ ແສງສຸລິນ

          ພີທີໂຮມຊຸມນຸມສະເຫລີມສະຫລອງວັນສ້າງຕັ້ງແຂວງອຸດົມໄຊ ຄົບຮອບ 60 ປີ ເເລະ ວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນເເຂວງອຸດົມໄຊ ຄົບຮອບ 60 ປີ ຈັດຂື້ນໃນຕອນເຊົ້າວັນທີ 15 ກໍລະກົດ 2022 ຢູ່ສະໂມສອນເເຂວງ  ພາຍໃຕ້ການເປັນປະທານຂອງ ທ່ານ ບຸນຄົງ ຫລ້າຈຽມພອນ ກໍາມະການສໍາຮອງສູນກາງພັກ ເລຂາຄະນະບໍລີຫານງານພັກເເຂວງ ເຈົ້າແຂວງໆອຸດົມໄຊ,ໃຫ້ກຽດເຂົ້າຮ່ວມມີ ທ່ານ ບຸນທອງ ຈິດມະນີ ກໍາມະການກົມເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ, ມີທ່ານ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ຫົວຫນ້າຄະນະໂຄສະນາອົບຮົມສູນກາງພັກ, ທ່ານ ບຸນປອນ​ ບຸດຕະນະວົງ ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ອະດີດຮອງປະທານສະພາແຫ່ງຊາດ ມີບັນດາຄະນະບໍລິຫານງານພັກເເຂວງ, ອະດີດການນໍາຂອງເເຂວງ, ພະເເນກການຕ່າງໆອ້ອມຂ້າງເເຂວງ ພ້ອມດ້ວຍພາກສ່ວນກ່ຽວຂ້ອງ.

     ໃນພິທີ ທ່ານ ບຸນຄົງ ຫລ້າຈຽມພອນ ໄດ້ກ່າວປາໄສວ່າ: ການຈັດງານໃນຄັ້ງນີ້ ເຮັດໃຫ້ຈົດຈໍາເຖິງ ເຫດການສໍາຄັນດ້ານປະຫວັດສາດ ແລະ ຫວນຄືນມູນເຊື້ອແຫ່ງການກຳເນີດ, ເຕີບໃຫຍ່ຂະຫຍາຍຕົວ ໃນພາລະກິດປົກປັກຮັກສາ, ພັດທະນາແຂວງອຸດົມໄຊ, ພັດທະນາກຳລັງປ້ອງກັນຄວາມສະຫງົບແຂວງອຸດົມໄຊ ເຊີ່ງພວກເຮົາມີ ຄວາມເອກອ້າງທະນົງໃຈ ຕໍ່ການເຕີບໃຫຍ່ຂະຫຍາຍຕົວ ແລະ ຜົນສຳເລັດອັນສຳຄັນໃນຫຼາຍດ້ານທີ່ ຍາດມາໄດ້ໃນ 60 ປີທີ່ຜ່ານມາ. ເປັນຂີດໝາຍປະຫວັດສາດອັນສຳຄັນ ແຫ່ງການເຕີບໃຫຍ່ຂະຫຍາຍຕົວຂອງແຂວງອຸດົມໄຊ ນັບແຕ່ນັ້ນມາ ຂະບວນການປົກປັກຮັກສາ ແລະ ສ້າງສາພັດທະນາແຂວງອຸດົມໄຊ ໄດ້ກ້າວຂຶ້ນສູ່ຄຸນນະພາບໃໝ່ ແລະ ສາມາດຍາດໄດ້ຜົນສຳເລັດ ອັນໃຫຍ່ຫຼວງ ໃນຫຼາຍດ້ານ ເມື່ອທົບທວນຄືນເສັ້ນທາງແຫ່ງການປົກປັກຮັກສາ ແລະ ພັດທະນາແຂວງອຸດົມໄຊ, ຈາລຶກເຖິງຜົນງານ ຄຸນງາມຄວາມດີ ຂອງນັກຮົບປະຕິວັດ-ອະດີດການນຳ, ສະມາຊິກພັກ, ພະນັກງານ, ກຳລັງປະກອບອາວຸດ ແລະ ປະຊາຊົນ ບັນດາເຜົ່າ ທີ່ໄດ້ເສຍສະຫຼະເລືອດເນື້ອ ເເລະ ຊີວິດ ເພື່ອພາລະກິດປະຕິວັດປົກປັກຮັກສາ ແລະ ສ້າງສາພັດທະນາ ແຂວງອຸດົມໄຊ ແລະ ມີຄວາມເອກອ້າງທະນົງໃຈທີ່ເຫັນວ່າຕະຫຼອດໄລຍະ 60 ປີທີ່ຜ່ານມາຄະນະພັກ-ຄະນະນໍາແຕ່ລະສະໄໝ ໄດ້ມີຄວາມຕັດສິດໃຈອັນສູງ ຜ່ານຜ່າອຸປະສັກ ຄວາມຫຍຸ້ງຍາກນາໆປະການ, ເສີມຂະຫຍາຍນໍ້າໃຈຮັກຊາດ, ເປັນເຈົ້າຕົນເອງ, ສຸມທຸກກຳລັງແຮງສັງລວມ ເຂົ້າໃນການປົກປັກຮັກສາຄວາມເປັນເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນ ໄວ້ຢ່າງໝັ້ນຄົງ.